Frühling-Event Jürg

Frühjahr 2009 - Jürg

Awäsend: Aui, usser de Tinu und de Ueli

Bim hütige 13er-Event isch üse Rä(e)cherswiler-13er-Kamerad a de Reihe gsi. Wöu är ängi Beziehige hett zu de örtleche Führwehrkamerade

hei mer üs schtandesgemäss bim Führwehrmagazin z’Rä(e)cherswiu troffe.

 

Im Führwehrmannschaftswage händ üs am Jürg sini Kamerade Richtig Arch gfüehrt, im Schlepp e gheimnisvoue Ahänger.

In Arch isch a de Aare unger aghaute worde und gli mou isch üs aune klar worde, was üs erwartet.

Im Ahänger isch nämlech es Schluchboot verschtout gsi. Das isch jetz uspackt worde und de Expedizionsleiter hett agfange mit de Inschtrukzion.

Aui si sich bewusst gsi, dass Disziplin ufem Boot unerlässlech isch und wie ne Läbensversicherig funktioniert!

Nachere aschträngende Schluchbootufblosaktion si de Chrigu auf de lingge Siite und de Roli uf de rächte Siite aus Gruppescheffs bestimmt worde (uf Nöidütsch heisse die hützutags „Drillmeischter“…!)

I de Mitti vom Boot die guet ipackte trochne Chleider und mit öppe 2 Bierli (oder si’s ächt drü gsi…?) isches losgange. Binere gmüetleche Fahrt,

jede mit sim Padu ir Hang und bim Gsang vo Seemannslieder (jäähhjooo….!), isches aareabwärts bis zum Hornusserhüttli z’Leuzige. Wöu d’Koordinazion

zwüsche de Drillmeischter nid immer klappt hett, isch ou öppe die eint oder angeri Piruette debi gsi!

Nachere subere Landig isch Biopouse agseit gsi und zur Uflockerig hett de Jürg no es Schnäpsle fürezouberet.

 

Vor luter Aschträngig und Tiimarbeit händ gar nid aui gmerkt, dass es heftigs Gwitter ufzoge isch. Nach dere Gwitterpouse si mer de aber doch witer gfahre.

Bis uf d‘Höchi vo einem Cämpingplatz. Dört hei mer i Form vonere militärische Notfauüebig (Überfau vo Camper im schwerige Gländ ohni Deckig!) s’Vorzäut vomene öutere Ehepaar ignoh.

Das Ehepaar isch derewäg begeischteret gsi vo dere Bsetzig vo frömdem Terräng, dass si üs mit Kafi und Schnaps ghoufe hei, die inzwüsche chaute Temperature z’überbrücke…!

De eint oder anger 13er hätt nach dene Schnapsporzione äuä nümm dörfe ines Mässgrätli blose. Trotzdäm hei mer’s nomou versuecht!

De Heinz hett aber bim Ischtiige e Wurzuschtock umarmet, wonem im Wäg gläge isch! (Hey, mach der e Bild vom Wurzuheinz…!) Ab denn hett eine weniger gruederet und wöu mer aui durchnässt gsi si und chaut gha hei,

hett de Eventleiter nachere churze Umfrog die Überläbensüebig abbroche.

 

Nachem Rückschueb uf Rä(e)cherswiu hei mer üs chönne dusche und die trochne Chleider alegge und si parat gsi fürne feini Grillasche.

Es paar 13er si de ufene sogenannte Dorfrundgang (!), wo mer be verschedene Privatpersone fründschaftlech si gäge Durscht bewirtet worde.

Sooo vöu Sehenswürdigkeite gits jo schliesslech ou nid z’Rä(e)cherswiu! Und der räscht het sich mit jasse und es paar Fläsche Bier gmüetlech gmacht.

Nacheme gmüetleche Schpaziergang i Cheschteleboum isch üs dört es feins Fondü Schinoas serviert wurde und de obligati Schlummertrunk hett natürlech ou no grad stattgfunge.

 

E supperr abenteuerleche Event, leider wägem Wätter chlei abkürzt. Danke, Jürg vo Recherswiu!

 

Copyright � 2015 13er Club Subingen

All Rights Reserved.