Herbst-Event Dinu

Läck, sooo gschiffet het's no nie...
Awäsend: Aui, de Fred chlei schpöter und de Ueli nume zum Znacht (dä isch grad vom Schpitau hei cho.)
 

Besammlet hei mir üs im St. Urs. Eigentlech hätt jo jede müesse es Köferli debii ha, wöu s'OK a de GV verkündet het, mir gienge 2 Tag uf d'Reis.

Aber wöu de Dinu es Datumgnusch gmacht het, isch de glich nur 1 Tag drus wurde. Guet, wägem grusige Wätter hätte mir glich nid chönne 2 Tag go trekke.


Wägem Durräge hei mir ou nid chönne go Minigoufe, wie’s de Dinu planet gha hätt. Flexibu wie mir haut mou si, hei mir, auso de Dinu natürlech, s’Programm no einisch umgschtöut:


MIR HEI JO SCHLIESSLECH E CHEIGUBAHN IM DORF !!
Uf dene 2 Cheigubahne im Höfli hei sich de 2 13er-Wettkampftiims gmässe.
D’Babeli hei sich mit de Chränz nume so abgwächslet und es isch zitewiis wie verruckt zue und här gange.
Im Dorf goht sit am Mäntig druf s’Grücht ume, s’Ruth heig müesse d’Cheigubahn renoviere…!
Weli Gruppe das weli gschlage und igsarget het isch leider nid dokumentiert und drum chäre si no hüt ume erscht Platz.


Ds’13er-Mietbüssli isch de gäge Obe de Fred und de Ueli go abhole und de Dinu het üs sicher uf Bauschtu gfüehrt.
Be de Minigoufalag – so richtig im Gjätt usse – hets natürlech ou e Beiz gha.
Und wöu’s immer no gschiffet het, si mir grad i die inegschtoche. Be dere Glägeheit hei mir de ou no d’Minigouf-Bahne gseh, wo mir hätte söue go s’Bäueli iloche, we’s troche gsi wär.
So hei mir de haut grad sofort i dr Minigoufbahnbeiz üse reserviert Tisch bezoge. De Beizer isch ou flexibu gsi und het üs s’Znacht öppis vorem abgmachte Ziitpunkt parat gschtöut. De Heinz het wie meischtens e feine Tropfe usgsuecht und bimene wunderbar agrichtete Büffée mit öppe 6 verschedene Sorte Fleisch für is Fondü und öppe 8 verschedene Salät und e huuffe angeri Bilage hei mir üsi Büch vougschlage.
Gli mou isch s’eint oder angere Bier agseit gsi und einigi 13er hei’s weder mou nid chönne lo si und hei d’Fläsche mit de Minigoufbahnbeiz-autizwätschge müesse läre.


Füre Beizer isches zwar schpot wurde, aber är het Fröid gha ar Schtimmig und am Umsatz. (!)


Sooo vöu Fröid, dass er grad no d’Schlummertrunkrundi gschpändiert het! Danke vöumou.
Es paar 13er hei i de gliche Nacht einigi Pröguattacke müesse über sich lo ergoh, und das wäge es bitzeli schnärchele.
Genau drum fröie mir üs scho ufe nächscht 13er-Gigg.


Dinu, danke für dä improvisiert, aber glungni Alass. D’Stimmig isch top gsi und s’Aesse e Wucht.
Ou no es ‚Merci‘ a d’Frou Präsi, wo de Vize isch go abhole, wöu er no nid zwäg gsi isch.

Copyright � 2015 13er Club Subingen

All Rights Reserved.