Frühling-Event Heinz

Wo geits ächt häre?
Awäsend: Aui, usser de Kusi, wo grad isch Vater wurde. Härzlechi Gratulation!

 

Zur Abwächslig hei mir üs weder mou ir "Trube" statt ir "Linge" troffe.
Ou de früschbacknig Vater Kusi isch schnäu cho ineluege. Sini Familie het ne aber brucht, drum het er leider nid chönne mitcho. Kusi, dinere Familie aues Gueti und danke no einisch für di erscht Rundi.
Nid mou a de schwäre Täsche und Rucksäch a hei mir e Idee übercho, wo de Heinz mit üs häre hett wöue.

Aus SBB-ler het är üs natürlech mit em öV usgfüehrt. Mit em Bus vo Subige uf Buchsi (für Nichteinheimische: Herzogenbuchsee) hei mir scho (weder mou) s'ganze Wasseramt chönne aluege. Chuum im Zug (e bequeme Doppustöcker) hei di erschte 13er scho e trochnige Gaume übercho und deför gsorget, dass die mitgschleipfte Täsche und Rucksäck chlei liechter wurde si.
Z'Bärn hei mir d'Glägeheit benützt, d'Architektur vor nöie Wäue vom Bahnhof z'beguetachte. Das het bsungers de Eugen überhoupt nid interessiert, är het deför z'mitzt ufem Platz es Sonnebad gno und isch zumene richtige Fuessgänger-Verchehrshindernis wurde.


Gli mou isches de wiiter gange bis uf Laupe. Dört hei je 4 13er es Schienevelo gfasst und los gange isches. Je 2 13er hei müesse trampe und di angere 2 hei chönne d'Gägend gniesse. Und wenn's richtig i'teilt hesch....!  ;-)

S'Dessärt isch de zum Schluss vo de Strecki cho: Fasch überhängend isch es de Hoger uf. Und wenn's richtig i'teilt hesch....!  ;-) (Kei Wunder, dass dört kei Züg me fahre, die hei sicher z'vöu Strom brucht de Hoger uf!)
Am Ziu hets e wunderschön i'grichtete Picknick-Platz gha. Und jetz hei mir scho wieder öppis us dene wäuts schwäre Rucksäck erfahre:
De Heinz het üs e wunderbare Zvieri uftischet: Salami, Landjäger, Chäs, Olive, früsche Zopf, Brot, Bierli, Wiisse, und und und...!
So ganz nach Heinz' Usflugsmotto "sportlech - gmüetlech - kulinarisch".


In flotter Fahrt und nachdäm de Ueli öppe zum 20. Mou het müesse usträtte, si mir de Hoger ab gfräset. Dodebi hei mir ou aui dä gföhrlech Houptstrasseübergang gmeischteret. D'Gschwindigkeit vo de Outo's hesch auso guet müesse ischätze!

Gmüetlech si mir wieder hei zue greist, auerdings mitemene kulinarische Stopp im Restaurant Bahnhof z'Buchsi.
De Heinz het üs dört es feins Znacht bschtöut: gmischte Salat, Saltimbocca mit Risotto, Gmües und dezue e feine italiänische Rote und zum Dessärt es Tiramisu.
Kafi mit Siitewage natürli ou. Vorhär und nochhär es Stängeli oder 2. Empfählenswärt ou für 'Nicht13er'!


Mit de Fahrt mit dr BSU uf Subige und mitem Schlummertrunk bim Präsi (danke Chrigu) het dä Usflug g'ändet.

Danke Heinz für die tiptoppi Organisation und dä gmüetlech Usflug. Sogar s'Club-Präsidium isch no in Amt und Würde, s'Komplott zur Absetzig hei die 2-3 ufständische 13er äuä ufgäh!

Copyright � 2015 13er Club Subingen

All Rights Reserved.