5 gäge 5

Si mir debi ... oder ächt doch nid??
Mitgmacht hei: Chrigu, Dinu, Kusi, Norbi, Geni + de chli Ueli

Nach angerhaubjähriger Warterei und Ungwüssheit, hoffe und bibere, isch es doch no wohr wurde:

 

De 13er-Club isch zum Casting für d’Färnsehsändig 5gäge5 iglade worde.

 

Konflikte innerhaub vo üs 13er het scho s’Färnseh usgschaute, in däm dass si ufe 5. Oktober iglade hei. A däm Datum si nämlech sowiso nume 7 13er zur Verfüegig gschtange. Sächs hei müesse go, eine het freiwöuig verzichtet und di angere si i de Ferie oder am Arbeitsplatz zügle gsi.

Am Vize si Sohnemann het grosszügigerwiis si 6-Plätzer zur Verfüegig gschtöut und so simer de haut am Sunntigmorge uf das Züri use (wäisch oder….!) gfahre.
Uese Tschi-Pi-Ess-ler Kusi het üs nach ere ganz churze Irrfahrt sicher zum Hotel Novotel gleitet.

 

Kafi und Goggi hei üs ufklöpft. D'Blase isch dadurch sehr agregt worde und d'Närvosität het sicher ou no zum durende Glöiff uf's WC bitreit.
Am punkt 12i isches de losgange. 9 Tiims hei um öppe 1 – 2 Schtartplätz kämpft.


De Chrigu aus üse Käpten het üses 13er-Tiim vorgschtöut und vo jedem öppis gwüsst z’brichte. Nochhär het no jede öppis vo sich säuber verzöut.

D’Isabelle, üsi Moderatorin, isch zur Hochform ufgloffe und het zum Bischpöu de Dinu ganz öppis angers gfrogt aus das, woner sich druf vorbereitet het…!

Aber kuul het de Dinu sofort gschautet und nach 0,75 Sekunde Bedänkziit e Antwort gwüsst.
 

So wüsse jetz öppe 50 Lüt meh, dass de Chrigu FCB-Fän isch, de Ueli gärn grillet, de Geni goht go wandere, de Kusi und de Dinu Cämper si und de Norbi Fürwehrkomänder isch.

Ueses Casting-Probe-Gägner-Team isch s’Nostalgie-Chörli gsi. Die singe Lieder us de Johrhundertwändi und si ou so agleit, we si singe. 6 13er gäge 6 Froue auso – und das het me guet gmerkt: die hei gschnoret und gschnoret und gschnoret und…..! (Vom Erbsli-Team aus Gägner hätte mir meh gha!)
 

Nach dem öppe 8-Minute-Uftritt und 1 ¾ Stung dinne hocke und de angere z’applaudiere isch dä Schpass dure gsi und mir si weder heizuegfahre.

Ueber üsi Chance i d’Sändig z’cho göh d’Meinige diametrau usnang. Die göh vo „kei Chance!“ über „nid schlächt ghaute“ bis zu „mir si debii“.

Mir wärde’s bis schpötischtens ca imene haube Johr vernäh.
 

So oder so, s’isch e nöi-i Erfahrig gsi und mir hei de Plousch gha. Sogar de chli Ueli wo chum über s’Schtürrad gseh het, het aui guet heigreiset, obwou uf de ganze Fahrt 5gäge1 gsi isch (1 = de chli Ueli!!!)

D’Linge-Maria het natürlech ou weder mou zue gha, drum si mir de haut zum chli, plogete Ueli hei no es Bier go ha und über üsi 5gäge5-Chance go wiiterdiskutiere.

Copyright � 2015 13er Club Subingen

All Rights Reserved.