Herbst-Event Kusi


Ab uf d'Böim...
Awäsend: Aui usser de Jürg (wo bisch ächt gsi?)

Scho baud traditionsgemäss hei mir üs ir Linge z‘Subige troffe. Zum Glück isch d’Maria no nid i d’Zimmerstund gange, sodass es no für aui es Stängeli gäh het. (Trotz de Mahnig vom Organisator Kusi, wo üs vor Aukohoukonsum gwarnt het.


So ab de 10ab2 si mir de aui chlei unruehig wurde, wöu üse 13er-Kolleg Jürg nid uftoucht isch. Hmmm… abgmäudet het er sich ou nid.

S’Natel het er nid abgnoh, d’SMS nid beantwortet.


Jürg – WO BISCH OU?  S’Rätzu het de sini Frou glöst, wo dehei gsi isch: De Jürg isch z’Zielibach bi de Hornusser !!!!  DAS GITS JO NID !!!!

Jetz, wo dä Bricht gschriebe wird, wüsse mir no nid, ob är üs eifach vergässe het oder ob är angeri Prioritäte het aus üse 13er-Club.
 

Jo-nu, ohni Jürg het üs de Kusi is Büssli verlade und isch mit üs gäge Jura gfahre. Mit hei natürli – wie gäng – spekuliert, wo’s chönnti häre go.

Und wöu sich dr Kusi uf de Iladig scho fasch säuber verplapperet het, si mir üs eigentli scho bim Stängeli einig gsi:
 

Seilpark Balmberg.


Natürli si üsi Spekulatione richtig gsi und nach ere rasante Fahrt si mir ou scho gli ufem Balmberg glandet.
 

No die warme Chleider montiere, Füdlegschtäutli und Händsche fasse, vonere nätte Dame s‘Wichtigschte lo erkläre, Muet fasse, los geits!
 

Guet gsicheret si mir los, uf die verschiedene, guagglige Parcours. Nid über Stock und Stei, aber über Houz und Seil si mir vo Boum zu Boum glouffe, gschwanket, grobbet, ghanglet, gfahre, gschwunge.

Höch obe  i de Boumwipfle hei mir zitteret, gschwitzt, nach Luft gschnappet, d’Muskle glockeret, gfluecht, aber jedesmou ou chlei stouz gsi, we mir wieder e Boum gschafft hei.

Einigi 13er hei fasch nid gnue übercho und si nachemene chüele Bierli no einisch i d’Böim.


Wo mir de aui weder feschte Bode unger de Füess gha hei, simer vom Balmbärg-Hospiz 1 Stock witer abe und hei scho nach 2 Minute Fahrt bim Reschtorant Vorderbalmbärg weder use gha.
 

Und scho isch de Kampf witergange: Chlei Bier, chlei Wisse, chlei Rote. Uf s‘Fleischplättli zum Ischtiege hei mir de auso scho müesse es längs Momäntli warte, deför isch’s de umso schnäuer gange, bis s’Fondü cho isch. Wöu’s dusse rächt chüeu worde isch, het’s de Kusi mit dr Bschtöuig gaaanz guet breicht.


Gmerkt hei mir, dass mir am Nomittag gschaffet hei wie verruckt i de Böim obe: s’het Hunger gäh. Usser am Tinu hei mir aui gnue Fondü gha, so dass di meischte nume no es chlises Dessär bschtöut hei… we überhoupt.


Mit es paar Pfund meh weder bim ufe fahre het üs de Kusi sicher uf Subige zrugg brocht, wo‘s de – gäng wie gäng – no zum Schlummertrunk gange isch.


Das Mou weder ir Linge, mir hei s’Maria no nid is Näscht lo go…! (si het üs deför no e Grappa gschpändiert, danke Maria!)


So Kusi, danke vöumou für’s organisiere vo däm 13er-Ivent.


Es het aune Spass gmacht. Und de gratuliere mir dir natürli no zum 7. Rang vo de beschte Outofahrer vor ganze Schwiiz, wo du am angere Tag eroberet hesch. Auso eifach es glungnix Wochenänd.

(Jürg, hesch öppis verpasst und mir fröie üs scho hüt uf 2 Runde, schpötischtens ar GV in Corcelles…)

 

Copyright � 2015 13er Club Subingen

All Rights Reserved.