Herbst-Event Geni

Mit Wanderschue und Rucksack...
Awäsend: Aui usser dr Jürg und dr Tinu

Einisch mehr hei mir üs ir Linge zu Subige troffe und afe mou mitenand agschtosse.

Uese Schofför, dr Geni, het leider ufs traditionelle Stängeli müesse verzichte. Mir si aui gschpannt gsi, ob dr Geni sini Drohige, wo är sit Johre g’üsseret het, wohr macht:

Nämlech en Usflug, wo us luter ‚Wanderig’ beschteit. Der Iladig noche hätt’s afe mou chönne si…!

Totau verunsicheret si mir trotzdäm is Büssli gschtege.

Zum Glück si mir aues so dünni Cheibe! I gloube, das Büssli isch sicher e haube Meter änger gsi aus aui angere…!
Z’Chriegstette hei mir s’Ruth -am Geni sini besseri Höufti- ufglade und si denn Richtig Aemmitau greist. So richtig i d’Höger ine si die Zwöi mit üs. Schlimmi Gedanke si ufcho: „Länge ächt 2 Centimeter dicki Schuehsole?“, „Was hani aues für Zwüscheverpflegig debii?“, „S’Zahnbürschteli hani vergässe…!“

Plötzlech, wiit ume ufem höchschte Punkt, hei mir aghaute, und das erscht no vore Beiz. Isch ächt aues doch nid so schlimm? Doch! S’Büssli hei mir müesse rume und s’Ruth isch mit däm eifach devo gfahre und het üs ir Beiz lo hocke…!

 

Auso doch…!

 

Abmarsch…!

 

Guet, wenigschtens hei mir dr Durscht zerscht chönne lösche. Denn isch es, liecht z’dorab und z’doruf, dur’s wunderschöne Aemmitau g’marschiert.

Ungerwäx hei mir denn ou auerlei Kurioses erläbt. Zum Bischpöu e Oepfuboumsunneblueme, flüchtendi Söi, oder es paar Lüt vomene Verein, wo uf de Beiks a üs vorbi grast si.


Nach zirka 2 Stung, auerdings inklusiv Verpflegixhaut mit Tschips, Wiessem und Bierli (darum dä gross cheibe Rucksack vom Geni…!), si mir uf dr Wäckerschwend achoh. Zu üsere grosse Ueberraschig isches dört denn so richtig losgange mit dr Aekschen. Graskarts mit abe gsetzte und verbreiterete Schassi si parat gsi.

E veritable Schilift het üsi Bolide denn öppe 200 Meter dr Hang ufe gschleipft und denn isch es in rasanter Fahrt –für die wo gnueg Muet gha hei- wieder abwärts gange.

Nachdäm mir gnueg Schtoub gfrässe hei und vom dureschüttle so richtig locker gsi si, hei mir i d’Beiz abe züglet, wo mir üsi Mäge hei chönne bim Husaregrill à Discression vou schloh.

Das stundelange Wandere het sich auso glohnt. Und nach em Dessär het üs dr Eugen sicher usem Aemmitau weder is Wasseramt gfüehrt. Bim Ueli ir nöi igrichtete Chäuerbar hets de no de Schlummertrunk gäh.

 

Fazit: Geni, s'isch doch nid so schlimm gsi mit marschiere, darfsch no chlei im 13er-Club bliibe…!  ;-)

 

16_09_06foto01.jpg 16_09_06foto02.jpg 16_09_06foto03.jpg

16_09_06foto04.jpg 16_09_06foto05.jpg 16_09_06foto06.jpg

16_09_06foto07.jpg 16_09_06foto08.jpg 16_09_06foto09.jpg

16_09_06foto10.jpg 16_09_06foto11.jpg 16_09_06foto12.jpg

16_09_06foto13.jpg 16_09_06foto14.jpg 16_09_06foto15.jpg

16_09_06foto16.jpg 16_09_06foto17.jpg 16_09_06foto18.jpg

16_09_06foto19.jpg 16_09_06foto20.jpg 16_09_06foto21.jpg

16_09_06foto22.jpg 16_09_06foto23.jpg 16_09_06foto24.jpg

16_09_06foto25.jpg 16_09_06foto26.jpg 16_09_06foto27.jpg

16_09_06foto28.jpg 16_09_06foto29.jpg 16_09_06foto31.jpg

16_09_06foto32.jpg 16_09_06foto33.jpg 16_09_06foto34.jpg

16_09_06foto35.jpg 16_09_06foto36.jpg 16_09_06foto37.jpg

16_09_06foto38.jpg 16_09_06foto39.jpg 16_09_06foto40.jpg

16_09_06foto41.jpg 16_09_06foto42.jpg 16_09_06foto43.jpg

16_09_06foto44.jpg 16_09_06foto45.jpg 16_09_06foto46.jpg

16_09_06foto47.jpg 16_09_06foto48.jpg 16_09_06foto49.jpg

16_09_06foto50.jpg 16_09_06foto51.jpg