Frühling-Event Enzo

Hüt geits höööch use...
Awäsend: Aui usser dr Willi

Wie fascht immer hei mir üs ir Trube z'Subige, ähhmm… ir Linge z'Subige zur Besammlig und zum Uftakttrunk troffe.

Natürlech het üs ou dr Enzo im Ungwüsse gloh, wo dass es Hüt häre geit. S'Turnzüüg hei mir müesse mitnäh und Duschmittu het er üs ou empfohle….!(?)

Ab si mir, uf d'Autobahn Richtig Bärn. Bärn hei mir aber links lo ligge und si Richtig Fribourg. Bi dr Usfahrt Niederwangen si mir weder is normale Verchehrsläbe itoucht.

Bire - vo usse gseh - stinknormale Fabrikhaue het üs de Enzo lo usstiege. Um was dass es geit, hei mir erscht gseh, wo mir i die riesig Haue inecho si.

Mit em 13er-Club geits eidütig ufwärts. We me's nid gseh hätt: ungloublech, zu was für sportlechi Höchschtleischtige die Giele fähig si.
Die beschte heis (gloub) bis zum Level 7 gwogt, natürlech suber gsicheret!

Vo "wäuts schräg" über                "sänkrächt" bis zu                      "überhängend schräg" und                   "überhängend waagrächt"                chasch eifach aues ha.

 Guet, am einte oder angere Elleboge hets minimi Schürfwunde gäh, aber Keine het sich öppis lo amerke.
Schliesslech si mer jo herti Sieche und einiges gwohnt a Schläg! (So vo wäge chlei schnärchele z'Nacht…!) Es guet's Gfüeu het aber sicher jede gha, wöu jede, wo isch go chlättere gwüsst het, dass är sich uf dä 13er-Kamerad het chönne verloh, wo ne gsicheret het.

 

Früsch duschet und durschtig het üs de Enzo weder richtig Wasseramt schoffiert. Natürli het's de im Büssli afe mou 1 gäge Durscht gäh…!

Ir Oeschbrügg z'Subige si mir ikehrt und hei e Spiessligrillschmous vom Feinschte 'müesse' über üs lo ergoh. Die säuber zämegschtöute Spiessli si e wahre
Gnuss gsi und s'Salat- und s'Dessärbüffee hei wunderbar gschmöckt. Einzig mit dene blöde Gummihändsche hei mir nid vöu gschiits chönne afoh.

 

Ahjo, de isch üse Präsi no völlig usser Form cho. Wo är vernoh het, dass si FC Basu ir letschte Sekunde de Meischtertitu gäge FCZ verlohre het, isch für ihn e chlini Wäut zämebroche. Nüt, aber ou gar nüt het ne chönne tröschte.

 

Bimene Schlummertrünkli hei mir, oder ämu die, wo no vorig blibe si, dä tolli Usflug lo usklinge.

Grazie mille, Enzo, für dä Supertag.

 

    

Copyright � 2015 13er Club Subingen

All Rights Reserved.