Herbst-Event Heinz

Dr Träffpunkt ir Trube d'Subige het verwirrig gschtifted...
Awäsend: Aui, und keine het’s bereut!


Dr Organisator Heinz isch haut ebe kei Subiger…! Aber zum Glück het’s kei Verschpötig gäh, wöu mir s’Restaurant „Trube“ aus Träffpunkt nid gfunge hei…!
Naja Heinz, es paar Johr länger 13er-Club, und du weisch, dass es in Subige nie wird e „Trube“ gäh! Usser du tuesch säuber e Beiz uf… Verschpötig häts aber bimene Hoor wäg üsne Fürwehrmanne gäh! Hei doch die gnau zur Besammligsziit müesse usrücke. Aber zum Glück isches – wieder mou – e Fäualarm gsi.

Pünktlech, wie me sich’s vom öffentleche Verchehr gwohnt isch, hei mir Subige verloh. D’BSU het üs sicher a Bahnhof gfüehrt, wo mir is rote Zügli vor RM igschtige si.
De Heinz het üs de ou no schnäu mit mene Bierli versorget. Mir hei erschtunt feschtgschtöut, dass einigi vo üs no nie mit em Zügli dur e Wiissesteitunnu hingere Bärg gfahre si.
(Guet gmacht, Heinz!)
Zur Ueberraschig vo aune si mir de z’Gänsbrunne usgschtiege. Aber mir hei grad wieder chönne ischtiige: I ne offne Wage mit mene regurichtige Kino druffe. Jo, es isch es bsungerigs Abentür, so (fasch) im Freie, am Luftzug usgsetzt, wieder i Tunnu ine z’fahre. Mir hei uf dr Fahrt zrugg uf Oberdorf s’eint und angere über d’Geologie vom Jura chönne lerne und chlei Tourismus-Wärbig isch natürli ou no debii gsi. (tunnelkino.hallo-mittelland.ch )

Uf dr Rückfahrt hets de wieder mou es Bierli gäh und öppis z’knabbere…bis mir z’mitz im Tunnu haut gha hei. Dört hei mir de - nach einige wiitere Informatione – üsi vorbereitete Pastis-Gläser dörfe mit früschem Quellwasser vöue. Naja, Gschmacksach !! Wieder in Gänsbrunne acho, si d’Wanderer zum Zug cho.
Mir si vom Bahnhof bis i d’Siky-Ranch gloffe. Die langsamschte hei do derzue sicher öppe 10 Minute brucht…

I dr Siky-Beiz hei mir haut scho wieder Durscht gha und chlei Hunger, bis mir de de lang Wäg, abe uf Corcelles under d’Füess gnoh hei. Das mou isch de Marsch öppe 3x länger gsi – und so richtig abentürlech. Het doch e morsche Boum, nur es paar Sekunde nachdäm das mir düre si, nümme möge stoh. Es het schnäu kroset und gsirachet und die wo zrugg gluegt hei, hei de Liechtboge vo de Stromleitig gseh, wo dä Boum abegrisse het.
De Adrenalinstoss i üsem Rohn-Stromer Jutzeler Tinu sim Chopf hei mir förmlech gschpürt. Er het aber innert Sekunde scho urgrächnet gha, dass sini Firma i däm Landesteil (no) nid zueschtändig isch.

Gmüetlech si mir denn in Corcelles achoh. Det het's im Restaurant L’Ertrière d’Argent es Apéro gäh und de hei mir üs uf's 'Filet du maison' zum Znacht chönne einige. I mues do dezue aber no säge, dass sich gloub nid nume de Schriber vo däm Bricht de Buch mit Rindsfilet à discrétion sooo vou gschlage het, dass es eim fasch nümme wohl gsi isch. Läck, hei die Fleisch ufgfahre und ou d'Zuetate si Fantastisch gsi. Eifach empfählenswärt…!

Mit Müeh und Not hei mir de üsi vougfr…. Ränze ufs letschte Zügli Richtig Soledurn gschleppt, mit mene gspändete Bierli vo de Wirtin.
In Subige achoh, hets de no de obligatorisch Schlummertrunk, das mou im Fifty-Fifty gäh.

Danke Heinz für dä glungnig Usflug mit em kulinarische Höhepunkt im Jura.


Copyright � 2015 13er Club Subingen

All Rights Reserved.