Frühling-Event Willi

Dr Träffpunkt im Tearoom Flury het für Ufregig gsorgt...
Awäsend: Aui ausser de Jürg (dä het id Ferie müesse!)


Dä arm Willi: är het auso scho no diverses müesse ghöre, wo mir üs im alkohoufreie Kafi Flury besammlet hei. Debi weiss är nämlech ganz genau, dass eigentlech kei einzige 13er gärn Bier het…! Und die Bemerkige wo gmacht worde si, hätte de Willi nume söue lo gloube, dass mir gärn es Bier gha hätte!

Gli mou isches los gange – wie gwohnt i üsem Clubfahrzüg, im Rohn-Büssli – sicher schoffiert vo üsem Gaschtschofför, am Toni. Los gange si ou baud d’Schpekulatione, wo’s ächt häre goht: Hmmm….Pulsmesser obligatorisch und gueti Schueh ??? Ueber Buchsi – Richtig Langethau! Go GoKart fahre si mir scho, chas nid si!? Oeppis sportlechs mues es si, bim Station Hard hei mir ghaute.

De Hanspi vo de Oberaargauer Bogeschütze het üs uf em Näbeplatz is Bogeschiesse igfüehrt Und det isch üs ou klar wurde, dass es mit 0,0 Promille ungfährlecher isch aus mit…! Nach dere subere Ifüehrig vom Hanspi und der Demo vo sim Kolleg, wo über 90 Meter locker troffe het, si mir de säuber zu Indianer wurde. Einzig s’Agriffsgebrüll und d’Ross hei gfäut bim Agriff uf d’Zähni uf dr Schiibe! Was die Meischte vo üs denn sicher troffe hei, isch der eigeti Unterarm: mit dr Pfiubogesehne. Trotz Schutz het’s teilwis rächti blaui Fläcke gäh. Fasch so schlimmi wie die, wo’s aube vo üsne Froue git, wenn si übere gingge bim schnärchele!

Zum Abschluss het üs de Norbert bewiese, was me mit de nötige Konzentration und em ageborene Jagdinschtinkt i churzer Ziit cha erlerne. Er het nämlech in überlägener Art und Wis de 13erpfiubogeusscheidigswettkampf im Finau gäge Kusi gwunne. Gratuleischen, Norbi! Aus 1. Pris het är es warms Bierli bicho (Jöhhh…..Uähhhh….).

Bimene churze, aber würkli notwändige Zwüschehaut hei mir de ändlech ‚dörfe’ es Bier bschtöue, damit d’Schpäut im Rügge wieder zue si. Ir Hasli-Brauerei z’Langethu isch üse Durscht glöscht wurde. (Momou….ou d’Langethaler chöi auso feins Bier braue, Komplimänt i Oberaargau!)

Nachere wiitere churze Fahrt si mir de im Löie z’Obermurgethau ikehrt. D’Bürinne-Vereinigung im Näbesääli het scho nach 5 Minute gnue gha vo üs und het is d’Türe zuegschlage. Deför het s’Tante Schuggi (Röösli) und Ruthli sich müesse üsne Schprüch ussetze. Die beide si im Serwiss tätig gsi. Bsungers dr Eugen hets guet chönne mit em Röösli. Und s’Ruthli het mit ihrer gwautige Schtimm ou immer en Antwort gwüsst. Was zwüschem Eugen und em Wirt ir Chuchi usse de no aues abgange isch, wüsse mir (zum Glück) nid.
S’Znacht isch superfein gsi. Es Megatütschi vomene Gordonblö hets gäh mit eme ganz guete Salötli vorus und s’Hürlima cha me ou trinke, we’s gnue chaut isch…! Es sauguets Pris-Leischtigsverhäutnis i däm Gaschthof. Cha me witerempfähle!

De Schlummertrunk hei mir no ir Linge z’Subige bicho, nachdäm mir s’Maria hei chönne überschnore, no öppis uszschänke.

Aus i auem: E würklech glungne Alass, wo de Willi üs do organisiert het. Danke Willi und ou no einisch für d’Schlummertrunkrundi. Es dicks „Danke“ am Toni, wo üs sicher furt und wieder hei gfüehrt het Ou es „Merci“ üsem Co-Sponsor Martin für’s Rohn-Büssli. De zwöit Co-Sponsor, PC-Höuf Tardo (das isch dä mit em grössere Logo…!) isch leider chum zum Zug cho, wöu mir wägem schöne Wätter d’Jagge nid brucht hei.

Copyright � 2015 13er Club Subingen

All Rights Reserved.