Herbst-Event Fred

Schpannend het ärs gmacht....
Awäsend: Aui, ausser de Heinz. Dr Eugen erscht chli schpöter.


Z’erscht mou üsem Houpt und Näbeschponsor no einisch uf däm Wäg es dicks „MERCI“ für die tolle Jagge. Scho baud Tradition:
Me trifft sich ir Linde. Sicher ou darum, wöu me bim härefahre mit Hockeyhöum und Hockeyschtäcke sehr guet beachtet wird…!
De Fred hett üs so richtig im ungwüsse gloh, wo’s häre geit, erscht rächt wo mer nach de Teamsitzig no hei müesse „hockeyprobeschiesse“ uf d’Linde-Türe.


Im Rohn-Büssli hett is de Fred furt gfüehrt. (D’Fahrwiis vom Fred isch auso no schlimmer wie die vom Eugen…!) Wo’s de in Lohn richtig Buechibärg gange isch, hei mers gwüsst:
 

De 13er-Club ghört ab 9.11. zur Heisosseiety.

Mir wärde drüber müesse diskutiere, ob mer aus Verein ou chöi Mitglied wärde im Goufklub Limpachtal.

( http://www.golf-limpachtal.ch/ )

Mir chöi jetz mit Begriffe wie ‚Putte’ ‚Green’ ‚Eisen 4’ oder ,Holz 10’ öppis afoh und wüsse, dass ‚Tee-Time’ nüt mit Tee trinke, und ‚Bunker’ nüt mit dr Armee 21 z’tue het. Ou glernt hei mer, dass nid aui Schotte e Rock a hei…! Aui Chleidervorschrifte hei mer knapp chönne ihaute. Einzig s’Rohnbüssli isch uf em Parkplatz zwüsche de BMW’s, Merzedes’, Jaguar’s und Porsche’s chli usem Rahme gfaue. Tinu, aus Mitglied im Goufklub müesstisch der de scho öppis lo ifaue.

Nach em obligatorische Zwüschedurebier (oder si’s ächt 2 gsi?) si mer im „Desperado“ z’Gerlafinge e typisch mexikanische Fuud go ha. S’Aesse isch fein und zwüsche „guet gwürzt“ und „scharf“ gsi. Einzig d’Rächnig isch gsauze gsi. Us Protescht si mer s’Dessär uf Räächerswil (betonig uf „ää“, gäu Jürg!) go ha.
Zum Abschluss het de Fred no zum Oeufi-Schlummertrunk i sis Heim iglade. Danke Fred für dä glungni Alass, machs aber s’nächscht mou bitte nümm so schpannend…!

Copyright � 2015 13er Club Subingen

All Rights Reserved.