Frühling-Event Geni

In Memoriam a üse Ueli

IMG_1161
IMG_1163
IMG_1164
IMG_1165
IMG_1166
IMG_1167
IMG_1169
IMG_1170
IMG_1171
IMG_1172
IMG_1173
IMG_1175
IMG_1177
IMG_1178
IMG_1179
IMG_1180
IMG_1181
IMG_1182
IMG_1183
IMG_1185
IMG_1187
IMG_1189
IMG_1191
IMG_1194
IMG_1195
IMG_1196
IMG_1198
IMG_1238
IMG_1239
IMG_1240
IMG_1241

 

 

 

 

 

so auso, es isch so wit, Ueli, nochdäm mir vor fascht emene Monet vo dir hei müesse Aschied nä, heimer der erscht Alass ohni dini körperlichi Awäseheit ka. Mir hei üs bim Chrüz z’Subige troffe und hei eigendlech gmeint, mir chönne de no eis go zieh. Aber neeei, de Geni het üs atribe is Bussli z’ischtige, wü mer schins scho tschpot sige. Zäneknirschent simer de haut igschtige. Mir sie de zerscht de Fred uf Solothurn go hole und denn si mir uf der Outobahn richtig Burgdorf gfahre. In Burgdorf heimer üs de aui e chli gfreut ufenes Burgdorfer Bier. Aber chasch dänke ,der Geni cha nid Wägwiser läse und isch im Chreisu die erstchi Usfart scho wider use  gfare anschtat die zwöiti z’nä. Ufem Navi wär scho lang g’stange «bei nächster Gelegenheit bitte wenden». Aber nei, Ueli, chasch dänke. Du glaubsch mir nid, mir sie bim Burgdorfer Bier eifach verbi gfahre. Gäu sö öbis gits doch nid.

 

Io auso, de simer haut in Oberburg bi der Firma Jenni acho. Jo und was dänksch Ueli, e Haubstung zfrüeh!  De Chrigu, Roli und de Remi sie ufe nöch Tschuttplatz go e Matsch luege, aber ig glaube eher das  die Drü es Bier sie gho nä.

 

Jä guet, der Herr Rolf Lüscher vo der Firma Jenni Energietechnik het de üs i Empfang gno und natürlech heimer die Drü müese go hole. Ueli, dä isch ou e Rote. Der Herr Lüscher het üs die Energietechik und Fortschritte nöcher brocht und het üs vor d’Ouge gfüert, dass es immer nume e Asichtsach isch, wiemer öbis aluegt und das es zäme besser isch als gäge nang. Aber das wüse, mir vom 13äner jo scho lang.

 

Du Ueli, mir hei es nöis 13äner-Getränk…. D’Firma Jenni het es Plätli ufgsteut mit früscher Züpfe - isch wäuts fein gsi. Es Blonds heimer au derzue becho, aber Ueli, nid es Bier sondern Ramseier Süesmost. Und ig sägter’s, die hei gsoffe und das het de Näbewürkige gäää….. 

 

Mir hei de g’stunt wo mer d’Füerig düre Betrib gmacht hei, wie suber und ufgrumt die Firma isch. Und wo mer de die Spicher gse hei, isch üs aune klar worde, dass mer äue aui üsi Hüsser nid wärde umbaue chönne - de so ne Spicher isch verdamt höch und breit.

 

Der Bsuech bi der Firma Jenni Energietechnik isch wäuts interesant gsi - mir bedanke üs häzlech für’s Gasträcht.

 

Mir sie auso wieder mit em Büssli richtig Subige gfare. Und du glaubsch es nid, Ueli, de Geni het äue würklech öbis a de Ouge, dä het wider d’Usfart im Chreisu verpast und mir si wider am Burgdorfer Bier verbi gfare - gäu do seisch du au nütmeh derzue. Mir si de der nit ganz gsung Martin z’Subige go hole und si richtig Solothurn a Bahnhof – eigentlich hätt er jo noni vüu dörfe schnure, aber das hei mir der ganz Obe nid gmerkt.

 

Ufem Peron1 heimer de no lehre rächne, den 13 Manne, wo zwe fähle und eine wo es Kafi nimt, git eifach nid 11Stange. Ok mir hei ei Stange z’vüu ka.

 

Mir sie de ufe Zug richtig Corcelles und hei im Zug g’wärweist a welere Station mir use müese - mir sie üs de einig worde und weu der Kusi der Lokfüehrer könnt het, het er’s voragmäudet wo mer use sette. Dä het de nit schlächt gstund und het üs weue zrugpfife womer de aber ei station früecher use sie. Ueli dini Bahnkenntnis fäut üs ou.

 

I der Bahn heimer de müese drüber diskutiere, wär i dini Fuesstapfe tritt um üsi Brichte uf üsere Homepage witerzfüere. Und üs isch aune klar, dass das schwirig, wenn nit gar unmöglech isch di Nochfouger z’si. D’Wau isch de haut uf mi gfaue, wiso weisi ig eigndlech nid, aber was ig weiss, isch das dini Fuesstapfe so gross si, das ig Johrzänte wirde bruche um sie nur um ene Bruchteil chönne z’füue. Ig verspriche der, dass ig mir Müeh wirde gä es i dim Sinn witerz’füere.

 

 

Z’Corselles im süubrige Sattu ( oder L’Etrier d’Argent) si mer de ig’kert. Mir hei Apero ka und hei no chli Sunne chönne gniese. Am Tisch het der Fred de no d’Cherze ufgsteut und azündet wommer zum Gedänke a di am Pfaffeweier azüd hei. So bisch du i dere Form i üsere Rundi gsi. Und mi persönlech hets wäutz klömt, i minere Bruscht, i däm Momät und ig gloube au bi de Angere bisch am däm Obe, immer wieder i ihrne Gedanke gsi.

 

 

Wenn mer s’Flämli vo de Cherze aus Symbou vom Läbändig-Si nä, si üsi Gedanke de Cherzewachs und somit wirsch du immer unger üs si, denn vergässe wärde mir di nie.

 

A däm Obe heimer wider emou g’schlemt und d’Ränze gfüut als hät’ss kes Ässe morn me gä. Aber das isch sooooo fein gsi. Und d’Gspräch sie mou tiefgründi und mou vo aute Manne wo jung blibe si gsi.

 

De simer de am haubi Eufi ufbroche richtig Bahnhöfli. Jä haut, do fäut jo eine, klar der Ueli isch ufem Tisch blibe. Mir hei de aui müesse lache, den wie früecher, wenn mer,  ufbroche si: «wo isch de Ueli»? «Dä isch ufem WC» hei müesse warte. Und so heimer au das Mou gwartet bis de Fred di g’hout het.

 

D’Solothurn hätte mer de gschlageni 40 min müesse ufe Bus warte. Und wie immer wenn zwe d’Initziative ergriffe heimer de plötzlech zwöi grossi Taxi ka. De simer haut de mit zwöi Taxi uf Subige zrug cho. Manne, dir heit wider bim Jenni nid ufpast, mitenang nid gägenang. Eieiei.

 

Auso Ueli, wie du g’sesch, dis Cherzli brönt! Dini 12 vom 13äner.

 

Geni, mir danke dir für e glungene Alass und dänk dra s’nöchschte Mou: z’Burgdorf gits feins Burgdorfer zum trinke ;-)

 

29.2.17 Enzo

 

Anwäsendi:

 

Geni, Remo, Chrigu, Norbi, Roli, Fred, Willi, Kusi, Stifu, Martin, Enzo, (Ueli in commemoratio) 

 

 

 

 

Copyright � 2015 13er Club Subingen

All Rights Reserved.