100i Fescht Norbi & Maya

100i Geburi Norbi und Maya
E’Fakultative
Trümpf hei gha: Chrigu, Willi, Roli, Remi, Stifu, Kusi, Dinu, Enzo
s’Näu blutt hei gha: Geni, Heinz, Fred
nu auso de:

IMG_0327
IMG_0328
IMG_0329
IMG_0330
IMG_0331
IMG_0332

vor mene Cherli het üs der Norbi & d’Maya, zu ihrem 100i is Srignas z’Därädinge iglade und sehr gärn sie mir vom 13er derbi gsi. Der gross Teil vom 13er hat wöue mitem Velo goh. Der Willi het uf siner wätteräpp nochegluegt und nach dere, hät es jo söue troche blibe. ÄR het aber fachmänische Blick a Himu ufegmacht und d’Manne überzügt, dass es äuä chönnt nass wärde und s’Auto äue die besseri Wau sig. Bösi Zunge behoupte, das sig nume so gsi wüu si z’fuu sige. Die sie de aber vom Bessere belehrt worde, denn bim Iträffe z’Däradinge hets afo sträzä, so dass de Tomate die nöchschte vierzää Täg ou kes Wasser meh muesch gäh, wenn se der Luft nid scho verhudlet het. Auso simer trockenen Fusses a cho und üs isch de nie ganz klar worde, wie mer das 100i wei ufteile. Ob 40 zu 60 oder gar 30 zu 70 und d’Iistiegswort vom Norbi zum Fescht hei au nid grad zur ufklärig bitreit. So hei mer aber de Blicke vor Maya entnoh, dass mer auä lieber fiftyfifty mache. Wie es aube so isch, hets z’erscht es Apero gäh mit feinem Fingerfuud und emene finem «Schlange-» oder «Vogu-» Bierli, so dass üsi Büch scho eigendlech vou gsi si. Mir sie da aber no is Säli und dört hets de no Z’nacht gäh. Em eint oder em Anger isch de so düre Chopf ob sich ächt die Scherfi vo däm Ässe nid no es zwöits Mou tuet räche - aber egau, im Momänt isch es eifach fein gsi!
Es het de no Musig gää zum tanze. Die einte Gescht hei, aber der Stifi, Chrigu, Dinu und de Kusi sie de go tschutte, und hei so ihri Kilo abgschwitzt. Es sig auso hert aber fair a z’Sach gange und es sig de au knapp usgange. D’Annete het de, nachdäm sie dene Manne zuegluegt het gha au no mit em Dinu e Matsch wöue mache und so hei sech der Remi und ig aus Gägner zur Verfüegig gsteüt. Üs zwene isch klar gsi, das mer der Dinu nid chöi i Seich ritte und so hei die Zwöi de ou 9 zu 10 gwunne. Und dank üs zwene, het der Dinu es Müntschi becho und voui 3 Minute hinech für d’Annett und mir zwe es Bier. Das mer üs do no richtig verstöh, mir rede vomene Töggelichaschteturnier!
S’feine Desert het de üsi Büch äntgüutig zum platze brocht und so heimer de der Obe mit emene feine Bier und guete Gspräch verbrocht. Apropos Gspräch, für die wo’s nid wüsse: «s’Srignas» isch im aute Bahnhof z’Därädinge und so heimer drüber philosofiert, wieso das me die Zugfüehrer nid tuet blitze - die fahre nämlech aui innerorts z’schnäu und natürlech het se der Kusi i Schutz gno den es sig schwirig so aus Maa sich uf zwöi Sache z’konsentriere: uf de Schine z’blibe und d’Gschwindigkeit iz’haute. Jä nu, löh mer das Mou so loh stoh und hoffe das es i Zuekunft meh Zugfüehrerinne wird gäh.
Merci Maya und Norbi ganz härzlech für d’Iladig, s’isch fein und lustig gsi! Fröie üs uf’s 200i!!!
Bhüeti Gott und dänk dra, es isch nid immer aues wörtlech z’näh.
Im Juli 2017 für e 13er, Enzo

Copyright � 2015 13er Club Subingen

All Rights Reserved.