GV 2016

GV 2016 – (30. Januar 2016)

Awäsend: 11 13er und 1 Gascht zum 2. Teil.

Leider ohni Geni, dä hetts tatsächlech gschafft, scho weder es Reisli z’mache amene wichtige 13er-Termin. So cha das nid witergo, liebe Geni. Trotzdäm vöu Vergnüege z’Barcelona!

 

Leider ou nid debi isch de Jürg. De Jürg isch sit de Gründig vom 13er-Club debi gsi und hett per hüt de Ustritt gäh. Mer bedure, aber reschpäktiere natürlech dä Entscheid. Danke Jürg, dass du zu de Gmüetlechkeit a üsne Aläss bitreit hesch und für di Zueschtupf gäge üse Durscht a de hütige GV. Bhaut üs (hoffentlech) i gueter Erinnerig und heb’s guet.

De Fred isch anere Kursleitertagig im Züribiet gsi und isch erscht zum Znacht zuenis gschtosse.

Die hütigi GV fingt sit langem weder einisch in Subige statt. Wöu im Herbscht 2016 s’Chrüz (vorussechtlech) zue geit, hetts Präsidium beschlosse, die Dorfbeiz zum letschte Mou mit üsere GV z‘be-ehre. S’Dorli und de Jürg tüe äxtra wäge üs d’Beiz uf, drum verzichte mer das Johr mou uf Treberwürscht z’Twann oder Rindsfilet z’Corcelles.

Sogar üse 13er-Norbi isch zur hütige GV erschine, obwou är gar kei Iladig übercho hett. Aber ohalätz, de Vize hett d’Rächnig ohni die gheimdienschtleche Röschersche vom Norbi gmacht.

Do jetz s’Wichtigschte vo de agregte, aber für einisch erfröilecherwys disziplinierte Diskussione:

è   D’Organisatore 2016 si: De Remo im Früehlig am 30.04.2016 und de Roli im Herbscht am 10.09.2016.

è   Witeri fixi Date:
18.06.2016: 50 Johr 13er-Dinu (Danke jetz scho für d’Iladig!)
02.01.2017: Nöijohrsempfang bim Pfaffeweiher
28.01.2017: GV

è   Wiehnachtszouber 2016: 03. - 04.12.

è   De Reingwünn vo de Wiehnachtszoubergrillbeiz 2015 wärde mer hüt a d’Chöschte vo de GV arächne

è   Üsi Statute wärde i verschedene Pünkt überarbeitet

è   De Weber Stefan hett üsi Ufnahmekriterie akzeptiert und wird aus Ersatz füre Jürg i üse Club ufgnoh!

      Härzlech wöukomme, Stifu!

 

Sogar de Norbi hett, trotzdem daser eigentlech jo gar nid debi isch, rege mitdiskutiert…! Mir hei zwar dadurch chlei Zyt verlore, aber jo nu haut!

 

Aus Gascht, und somit einzige Nicht-13er, isch zum 2., sogenannt gmüetleche Teil de no de Andi Richner zu üs gschtosse. Är hett üs i de Grillbeiz am Wiehnachtszouber ungerstützt und tuet so sis verdiente Sackgäud izieh! No einisch danke Andi für dini Ungerschtützig

Zum Znacht hett üs s’Dorli es huere guets „Dorli’s Wysüppli“ und uuuuufeine, butterzarte Suure Mocke mit Härdöpfuschtock kochet. Zum Dessär hetts de no es feins Glässeli gäh.

Üse Haubprofigaschtronom hett wie gwohnt e feine Italiäner (dä heimer äxtra igfüehrt, angeri wärde usgschafft ;-)…!) usgsuecht, bevor dasmer zu de Kafi’s mit Siitewage (Grapääli) und zu de Schlummerbächer gschritte si.

Und hey: De Norbi, me gloubt’s gar nid, isch bis am Schluss, oder sogar no länger, blibe, obwou är gar nid iglade worde isch. So richtig trötzelet hetter…! ;-)

Links: Für einisch keini…

Copyright � 2015 13er Club Subingen

All Rights Reserved.