GV

GV 2012 – (28. Januar 2012)

Awäsend: Aui !!! Halleluja !!!
 

Troffe hei mer üs i de königliche Pizzeria z’Subige. Zum 1. Warm öp hets natürlech es Bierli gäh. Oder si’s ächt zwöi gsi…?

De Uftakt bim König vo Subige hett üse erscht 13er-Grosätti, de Kusi übernoh. Danke no einisch.

De Rainer, de 14t Maa i de Rundi und üse Schofför, isch de aschliessend mit üs gäge Twann zue gfahre. Vorauem die i de hingere Reihe hei müesse feschschtöue, dass de  a däm Büssli öppe nöi-i Schtossdämpfer noche wäre. Das hett jo fasch blau Möse gäh am A… äähhmm Fudi.

Z’Twann am Bahnhof hei mer de no zuefäuigerwis üse Fred ufglade, wo separat agreist isch.

Im Kapfguet obe acho, hei mir üs sofort i üses Chäuerverlies zrüggzoge. De Präsi und de Vize hei de i de nächschte öppe haub Schtung versuecht, e einigermasse gesitteti GV z’leite. Unmöglech bi däm wöude Huuffe. Läck, isch das weder es huere Durenangduregschnorr gsi! Und luut wie ne moore…! Nei, so geit das nümm nächscht‘s Johr! (Wahrschinlech versueche si‘s so, dass s’Präsidium freiwöuig geit, wöu’s ne süsch nie glingt…!

 

Do auso die wichtigschte Koordinate vo dere GV:

     - de Früehligsevent am 17.03. plant de Ueli. Start isch  äuä scho am Vormittag und d’Chöschte si ou chlei meh)
     - de Herbschtevent am 27.10. plant de Geni
     - GV 2013: 26. Jänner! Usnahmswis scho gäge Mittag miteme gmüetleche Bröntsch oder miteme feine Schtück Fleisch zum Zmittag
     - Fakultativ: Neujohrsempfang am 02. Jänner 2013 bim Pfaffeweiher mit Wurschtbrötle
     - 13 Johr 13er im Johr 2014: S’Präsidium isch immer no am evaluiere, cha aber leider immer no keini Details bekannt gäh.
     - A de nächschte GV gits Details, verschproche!
     - SUUPPEERRR: de Geni hett für aui 13er e warmi Wulechappe organisiert, wo mir bi däm aktuell chaute Wätter würkli gäbig chöi bruche.
     - De Enzo Tardo isch für d‘13erLogo Stickerei besorgt gsi und am Geni si Arbeitgäber hett das aues finanziert und  gschponsorisiert.

                                                                                                                 DANKE VÖUMOU !!!

 

Nach däm wirre Versammligsablouf hei mer’s de sogar no gschafft, ÄNDLECH, nach öppe 3 Johr es Gruppeföteli zmache, wo ou a üsem angere Sponsor grächt wird.

Chuum fertig gfötelet, hett s’Winzerpaar Theo und Sonja die feine Treberwürscht ufgfahre. Zäme miteme feine Härdöpfusalat hei mer üsi Büch mit dere wunderbare Schpezialität gföut.

Begleitet natürlech miteme feine Huswy vo de eigete Räbe und zum verriisse hett’s natürlech ou no es Schnäppsli gäh. Es Sorbée, natürlech mit Wybeeri hett das Menü abgrundet.

Scho bau Sunntig isch’s gsi, wo mer weder heizue si. De Jürg hett‘s mit Müeh und Not gschafft, am Rainer klari Sicht z’verschaffe. Und das Mou hei mer’s sogar bis uf Subige gschafft, ohni vo de Polizei ufghaute z’wärde.

 
Links:

http://www.reusser-transporte.ch/

http://www.tardo.ch/

http://www.rohn.ch/de/index.php

http://www.kapfgut.ch/

Copyright � 2015 13er Club Subingen

All Rights Reserved.