Frühling-Event Ueli

Frühjahr 2012 – (17. März 2012)
 
Awäsend: Aui !!! Jawolll… !!!

Wöu drü 13er churzfrischtig erscht am Nomittag hei chönne aträtte, hett de Ueli s’Programm ou churzfrischtig müesse apasse und so hei mer üs ab de 4tuab3 bim Pizza König troffe.

Es erschts Heileit hett de Enzo gschafft: Dä Cheib hetts doch tatsächlech inere Minute vo Sion und Subige gschafft…!
Mitem 4i-Bus isches de losgange gäge Soledurn zue und scho im Bus si die erschte Spekulazione über üses Reiseziu losgange. Ufem Böuderräzu uf de Iladig isch jo nume d’Rötibrügg aus eidütige Hiwiis z’erchenne gsi.
Nachem 1. grosse Fuessmarsch vom Bahnhof über ebe die Rötibrügg isch ou scho de Apéro i Form vo Bier,  Gwürztraminer und Schinkegipfeli agleferet worde
und glichzitig hett ou d’MS Pisoni am Schiffsschtäg agleit. Sofort nachem Ischiffe isches de i gmüetlecher Fahrt aareufwärts gange. A däm wunderschöne und warme
Früehligstag hei mer die wunderschön Landschaft mou vonere angere Perschpektive chönne aluege.
 
Die 13er wo scho gnue Apéro gha und d’Landschaft scho fertig beobachtet hei, si intensiv mit witere Schpekulatione über’s nachfougende Reiseprogramm beschäftiget gsi.
D’Rückfahrt nach Soledurn hett bim Landischtäg und ohni Schräglag g’ändet. Vo dört a isch de 2. gross Fuessmarsch vo ca 95 Meter agseit gsi.
Chum im Bus hei mer scho weder müesse usschtige. Das isch so öppis vo schnäu gange, dass de Reiseleiter d’Hautschtöu glatt verpasst hett und de Schofför hett
müesse beschtäche, das dä üs bim nächschte Rotliechthaut schnäu usegloh hett. Danke, liebe BSU-Schofför! J
Das Mou öppe nach 200 Meter Fuessmarsch (heieiei…scho de 3. Hüt…!) si mer scho bim hütige Tagesziu acho: Restaurant 11i-Bier.
Sofort si d’Hydrante gföut, de Apéro 2 ufgfahre und isch enand zueproschtet worde. Zum Houptgang hetts de es feins, urchigs Bierbrauerznacht gäh mit Weiss- oder Schwinswurscht und Härdöpfusalat.
A zwöi vo üsne Sponsore hett üse Präsi dörfe es 13er-Foti übergäh aus chlises Dankeschön für Chappe und Hömmli.
 
Wöu de OK-Scheff no e Bekannte atroffe hett und die angere 13er nid (nümm) hei chönne es paar Zahle zämezöue, hei mer sogar no de Bus verpasst.
So si mer haut no dur d’Stadt gloffe. (…de 4.!!!) Die Einte si i de „Grüene Fee“ glandet und hei no e Absinth gnämiget und die angere hei im Bistro de erscht Schlummertrunk gschlückt. Ou de Eugen hei mer am Bahnhof sogar weder gfunge!
 
Wenn nid de Eugen de no öppe e Stung lang zwüsche Subige und Chriegschtette sini Bröue hätt müesse sueche, wär dä Obe eigentlech in Minne verloffe.
So aber isch zum Abschluss doch no chlei Hektik ufcho, aber üse Eugen isch zum Glück gsung deheime acho. De Abschluss vom Tag hett de dört stattgfunge, woner agfange hett: De finale Schlummertrunk hets bim Pizza König gäh.
 
Links:
 
 

Copyright � 2015 13er Club Subingen

All Rights Reserved.