Herbst-Event Norbi

Herbst 2011 - Norbi - (27. August 2011)

Awäsend: Aui!

 
E Turm, Asterix und Obelix mitere Wöudsou si so vagi Hiwiise gsi uf de Iladig vom Norbi, und s’Velo hett zwingend ou müesse debi si.

Troffe hei mer üs, s’erscht Mou, im Wohnheim Kontiki, zum obligatorische Uftaktbier. Ou de früsch operiert Jürg hett sich’s nid lo näh, trotz sim Ganzarm-achsugschtöu a däm 13er-Event teilznäh.
Wöu ou de Ueli liecht agschlage a Schtart isch, hett de Norbi – ou wägem unsichere Wätter – s’Programm entschprächend gschautet und organisiert.

                                                     Frei nachem Motte: „gmüetlech, easy, und chlei Witerböudig schadet ou nid…!“

Zur Überraschig vo aune si mer de aber nid öppe mitem Velo ufbroche! Nei, z’Fuess hett üs de Norbi gäge d’Landi gfüehrt. Dört si mer vomene Landimitarbeiter in Empfang gnoh und i d’Höchi gfüehrt worde.Die lädierte 13er hei de dörfe mitem Lift die 50 Meter i d’Höchi fahre, die angere hei die paar Schtägetritt unger d’Füess gnoh.

 

D’Ussicht uf Subige us dere Perschpektive isch es paar 13er ganz frömd vorcho. Hett’s doch tatsächlech söttigi debi gha, vo sit 12 Johr 100 Meter Luftlinie vom Landiturm wohne, aber’s no nie ufe gschafft hei…!
Dank ame chline Apéro – danke, Landi Subige! – si mer früsch gschtärcht weder gäge s’Kontiki schpaziert.

D’Drohtesle ungerem Füdle isches de über Stock und Schtei und Flurwäge gäge Däredinge zue. Dank am Enzo sim E-Bike hett ou de Ueli d‘Schtiigig über d’Outobahnbrügg (fasch überhängend…!)
locker gschafft und bis is Reschtorant Freischütz isches de nume no flach gange.

Nacheme Schlössli-Stängeli isches de scho baud weder gäge Subige zue.
Zur Überraschig vo aune si mer im Mehrzwäckgebäude vo de beide Samariter-Froue Pia und Maja empfange worde. Die beide kompetänte Froue hei üs versuecht, s’GABI us z’triebe und ABCD ine z’hämmere…

Mit Gummimaske bewaffnet hett jede Beatmigsüebige gmacht. So isches de ou zu komische Situation echo: De einte 13er isch de Ranze i Wäg cho und Angeri hei d’Gummipuppe plötzlech mit
prominänte Schauschpelerinne wie d’Angelina Jolie verwächslet, hei si umkehrt und ufe Rügge gleit oder si sich plötzlech wie imene Vampirföum vorcho…!

Seriös isch d’Demo vom Defi über d‘Bühni. Es si gloub aui be-idruckt gsi und es hei sicher aui öppis chönne lerne i dere Lehrstund.

De einzig wo d’Kippi gmacht hett, isch de Prokischribertisch gsi, dä hett d’Wärmi aus einzige nid möge verliide und isch abgläge. De Prokischriber hett zwar wöue flüchte und hett e Sprung abem Tisch gmacht,
hett aber glich Chopfverletzige devot reit. Aber d’Samariterfroue hei sich sofort um dä lädiert kümmeret. Gueti Besserig!

 

Hungrig isches de zum Glück nume no abwärts gfahre mit üs. Nach ca 500 Meter si mer im Chrüz zum Irish-Obe igloffe.
Chum isch s’erschte Bier ufem Tisch gschtange, isches ou losgange mitem Wöudsoubrote, Folie-Härdöpfu mit Crèmefresch und eme  Salatbüffee. D’Wöudsou isch wunderbar zart gsi und fein gwürzt gsi  und hett nume no uf üs gwartet.

Die musikalischi Ungerhautig hett üs de aber nid unbedingt chönne überzüge. D’Leifbänd hett zwar guet tönt, hett aber äuä nid meh aus öppe 30 Prozänt irischi Musig gschpöut.
De Diitschei hingäge hett 0 Prozänt irischi Musig abgloh. Vo däm hesch aus chönne ha: vom Bierzäutgeträllere über d’Biitels, ABBA, Udo Jürgens, Trio Eugschter bis hin zu Eissidiissi und zu de 7 Brügge…!
Und das so lut, dass sich töu hei müess a bäägge.

Und weisch, was no s’Tüpfli ufem i gsi isch? Zwöi 13er-Froue hei sich im gliche Ruum ame Näbetisch vergnüegt…!

NEI, DAS GITS JO NID…! Nid mou amene verdiente 13er-Obe chöne mer unger üs si…! ;-)

Jo nu, mir hei glich de Plousch gha und langsam si de zu vorgrückter Stung und nacheme chline Dessär die Einte oder Angere weder hei zue.

Höche dorfpolitische Bsuech hett de ou no für Ungerhautig, oder je nach Sichtwiis - für Chopfschüttle, gsorget.

Danke Norbi für dä gmüetlech Samschtig, die lädierte 2 13er si bsungers dankbar gsi, dasses nüt z’schtresse gäh hett.

http://www.whkontiki.ch/

http://www.landiwasseramt.ch/

http://www.samariter-subingen.ch/

Copyright � 2015 13er Club Subingen

All Rights Reserved.