GV


GV 2011 – (29. Januar 2011)
Awäsend: Aui, usser de Remo

 
Träffpunkt isch für einisch in Soledurn gsi, dass die Uswärtige nid zerscht hei müesse uf Subige areise.
De Remo hett wägeme grade Geburi i de Familie leider müesse fähle und de Jürg isch trotz Buchweh agreist. (D’13er si ebe herti Cheibe…!)

 
Nachem Uftaktbier im Vorstadt-Bistro isch s’Zügli mit üs uf Corcelles hinger die erscht Jurachetti g’fahre. Diversi Mäge hett me scho bim i d’Beiz hingere louffe ghört chnure…

 
Nacheme churze Apéro (Panasch, Bier und Absinth) hei mer üs zur GV is Spiissääli zruggzoge.

 
D’GV-Traktande si zügig über d’Bühni (trotz dene jedes Johr wiederkehrende Techtelmechtel vo wäge Präsidium ablöse…!) Wenn gsehnd ächt gwüssi Mitglieder ändlech i, dass si kei Chance hei?)

Do s’Wichtigschte ganz churz zämegfasst:

 
- de Früehligsevent plant de Ueli _ (wahrschinlech bereits Start am Vormittag!)
- de Herbstevent plant de Norbi
- GV 2012: 28.01. in Twann (Treberwurst im Kapfgut)
- Willi wird mit em Enzo zäme ab sofort die Homepage betreue
- de Heinz wird en fakultative Event i sim Garte organisiere
- de Dinu regt d’Aschaffig vonere warme Chappe a aus Ergänzig zu üsem Cap. S’Präsidium tuet sich dere Thematik anäh!
- 13 Johr 13er im Johr 2014: S’Präsidium isch bereits am evaluiere, cha aber no keini Details bekannt gäh

Usser: Föht afe afoh schpare…!

 
Nach däm wichtige gschäftleche Teil isches de losgange mit „Filet de maison“, säuber kochet inere wunderbar feine Chrüterbutter.
Begleitet dur es Salätli vorewägg, eme feine Tropfe us spanische Räbbärge, gsungs Gmües und 2 – 3 Pommes hei doch tatsächlech die Meischte no es Dessärt ine gfreset.
S’Kafi mit Sitewage hett natürlech ou nid dörfe fähle.
Gueti Besserig am Jürg, wo üs uf haubem Wäg vom Znacht us magetechnische Gründ hett müesse verloh.


Schön, dass cho bisch, aber mir hätte natürlech ou für’s deheibliibe Verständnis gha!

 
De 10i-Zug het üs de weder uf Soledurn gfüehrt, wo mir dank keim Busaschluss noch einisch Durscht übercho hei.
D’Subiger unger üs hei de no de Schlummertrunk ir Linge gnoh.


Bis zur nächschte GV i de Räbbärge ob Twann!

 

Copyright � 2015 13er Club Subingen

All Rights Reserved.