Herbst-Event Kusi

Herbst 2010 - Kusi
Awäsend: Aui!

Gäng wie gäng: I d‘Linge z’Subige hett de Kusi üs ufbotte, bim König wisawii hei mir üs troffe.

            (D’Öffnigsziite vo de Subiger Beize löh gäng wie meh z’wünsche übrig…!)


Nachem obligatorische, bierige Uftakt hett üs s’Büssli mitem Kusi sim Sohnemann aus Schofför, uf eine vo de schönschte Ussichtspünkt im Ämmitau brocht.
Im Bärgrestaurant Ahorn hett üs de Kusi es feins Zvieriplättli mit Egger-Bier lo serviere. Sas isch e Uftakt!!!


Nach däm hochstehende Gnuss si mer zur Fun-Abfahrt is Tau mitem Trottinett iglade wurde.
SUVA-like mit Höum usgrüschtet isches bärgab. Die Einte rasant und stromlinieförmig, die angere gmüetlech, d’Ussicht gniessend. Die Gmüetleche si de haut gschtrooft wurde, indäm si chlei meh hei müesse i de Gägeschtigige ufelouffe.
Aber für aui isches es Toperläbnis gsi, vorauem ou, wöu s’Wätter mitgschpöut hett.


Ou d’Schlussliechter Ueli (Sturzopfer mit es einige blaue Fläcke)  und Enzo (isch no am Vortag aus Notfau im Schpitau gsi) hei de Aschluss gäng weder gschafft, wöu d’Juflicheibe unger üs fründlecherwis immer
weder es Pöiseli gmacht hei. No nid ganz im Tau, bimene typische Ämmitaler Buurehus het de Kusi use gha.
Die verschwitzte Gringe hei sich diräkt im Brunne chönne abchüehle. De Inneteil vom Körper hett sich aber ou chönne abchüehle – mit chüehle Flüssigkeite!


Im schattige Garte vo de Buurefamilie hei mir üs vo de „Strapaze“ chönne erhole. Be teils ärnschthafte und teils weniger ärnschthafte Gschpräch isch es wunderbar feins Grill-Znacht mit verschedene
Salät immer nöcher cho. Einzig de Hofhund hett es paar unsympatischi Gsichter usgmacht und hett sich entsprächend unfründlech verhaute…vorauem üsem Präsi gägenüber!

 

Gmüetlech isches gsi, und d’Schtüeu im Garte si beschtens bsetzt gsi.
Es hett sogar 13er gha, wo es Chröösi gmacht hei unger de Pergola…! Wo de üsi Gastgäberin no mit de Kafi-Schüümli ufgfahre isch, hett si no einisch schträng gha, bieses kei Kafi me gha het.
 

Kusi’s Sohnemann hett üs de weder mitem Büssli abghout und üs sicher uf Subige gfüehrt.
Die Einte si de grad heizue, die angere hei dä schön Obe no bimene Bier und emene Täuer Kebabräschte lo usklinge.

Copyright � 2015 13er Club Subingen

All Rights Reserved.