Frühling-Event Enzo


Frühjahr 2010 - Enzo - (17. April 2010)
Awäsend: Aui, usser de Jürg

 
Wo angers aus ir Linge hei mir üs zum Uftaktbier (oder si’s ächt 2 gsi?) troffe.
Scho baud hett üs de aber de Enzo zur Besammlig be de Bushautschtöu grüeft. Mitem BSU si mer gäge Buchsi zue gfahre, wo mer ufe Zug umgschtege si.

 
Nume churz isch isch die Fahrt gsi uf Burgdorf, wo mer gopfredstutz scho weder Durscht gha hei. Nach däm Zuschebierli, aber immer no üsserscht klar im Chopf, und eme 5 minütige Fuessmarsch (wäuts aschträngend gsi) si mer unverhofft ufem Kriminaukommissariat glandet. Nenei, mir hei nüt verbroche…
 

De Poschtescheff vom Kriminaukommissariat isch e ächte Krimibeamte gsi, isch zwar jetz pensioniert, git aber üs sini imensi Bruefserfahrig witer.
 
ÄR hett üs orientiert und instruiert, was üsi Ufgab isch i de nächste Dienschtschicht!

 
I 2er-Teams hei mir die verschedenschte Ufgabe müesse versueche z’löse, Spure erkenne und sichere, Dischtanze schätze und mässe, d’Nase teschte mit Grücht vo verschedenschte

Stoff und Ruschgift erchenne.
Dass de Remo uf Ahieb Marihuana erchennt het, isch üs de aber zemlech schräg inegfahre, und de Chrigu hei mir ou müesse rette, wöu sich be de Libesvisitation d’Puppe hett afoh wehre. E wüeschti Schlägerei hett das abgsetzt…!

 
Mir hei uf au Fäu usegfunge, us welere Richtig dä tödlech Schuss isch abgäh worde, mit welem Wärchzüg dass s’Fänschter isch knackt wurde und i welem Artiku vom Schtrofgsetzbuech muesch go nocheläse, wie mängs Johr das de Remo wäge Marihuanakonsum i Knascht mues! Ahjo, und mit Fauschgäud mues ab sofort niemer me e amene 13er wöue zahle, das erchenne mer jetz uf Ahieb!
 

Nach dere lehrriche Krimi-Lektion si mer weder Subige zue. Be de Maria ir Linge isch für üses s’Znacht uftischet gsi. De Angelo hett üs mit feine Antipasti, eme zarte Steak mit Salat und Pommes verwöhnt. Es feins Tröpfli Wii und es Grappa zum Kafi hei ou nid dörfe fähle.

 
Zur Überrschig vo aune isch üs de no einisch e Lektion erteilt worde. De Wber Stifu hett üs doch tatsächlech s’Pokere bibrocht nachere usfüehrleche Ifüehrig hett sich de Eint oder Anger 13er zum Pokerface gwandlet. Bis öppe am 2 am Morge isch es gange, bis de Sieger bekannt gsi isch.

 
E abwächsligsriche Tag isch so z’Änd gange und d’Maria hett üs ou uno zur Ustrinkete iglade.
Vöu Glück in Soledurn im City.